日下san係Marine Life既老闆, 出發前我同佢講左我地坐邊班船. 到達時日下san已經响碼頭等緊我地. 同一時間仲有另一對日本夫婦. 日下san揸小貨van將我地既行李車返民宿. 日本夫婦知我地唔識日文, 就帶我地行. 佢地兩個都好開朗, 亦肯用英文同我地傾計.
Marine Life係一間日式既兩層屋. 客房有4間房. 兩間和室, 一間洋室, 一間和洋室. 房全部响2樓. 房間係無洗手間. 2樓有兩個公共洗手間, 係浴室+廁所. 房間係無冷氣, 怕熱既朋友就要留意. 不過雖然夏天下畫响出面會熱死人, 但係溫差大, 入夜後就會好涼. 我地打開窗訓, 好通爽. 好似只係開左一晚風扇吹左一陣.
樓下就係食飯既地方. 第一晚我地同日本夫婦坐响tatami果邊食. 之後入住既人多左, 日下san可能怕我地唔慣屈住腳坐tatami, 我地都係响餐枱食.
樓下除左食飯, 仲有一個風呂, Sauna同室外Jacuzzi. 風呂每間房每晚可以用一個鍾. 時間就日下san會安排. 當然有需要時係可以改既.
屋外亦有BBQ. 有一日日下san同朋友一齊BBQ, 佢既朋友知我地係香港黎, 仲特登燒左d好好味既豬排請我地食.
民宿係1泊2食, 即係包晚餐同早餐. 至於午餐呢, 田代島係無餐廳既. 午餐就要靠自己(例如食杯麵)或預早叫日下san安排. 日下san既廚藝非常了得, 所以食物都係佢負責. 人多既時候佢老婆或佢個仔就會黎幫手.
仁斗田港係向東, 可以影到日出, 但係夏天時日出係430am, 我起唔到身. 至於日落就要行去島既另一邊. 不過當時天氣唔好, 我都無去搵位. 本黎仲諗住影星軌, 但係幾夜唔係落雨就係有好多雲. 腳架攞左去一次都無用過 >< 日本各地日出日落月出月落既時間表: http://www.nao.ac.jp/koyomi/dni/
民宿 マリンライフ: http://www.marinew.com/
#1 我地間房向外望. 4間客房都係望同一個景
#2 我地間房無影到, 影左隔離同我地一樣既房. 但我地係尾房, 所以右邊會多左個窗.
#3 由遠處望返民宿. 相最左邊就係我地間房
#4 民宿既花園
#5 食飯既大廳
#6 另一個廳, 可能日下san驚我地坐唔慣tatami, 所以除左第一晚晚餐, 我地都係响呢邊食
#7 第一晚既晚餐(餸係未上齊).其他既晚餐同早餐, 可以去相簿睇
#8 第三日既早餐
#9 有入口即溶感覺既豬扒
#10 風呂
#11
其他民宿マリンライフ既相片: http://www.fotop.net/edwardtsang/japan2010k
No comments:
Post a Comment